DUHA KA LALAKI GIPAMUSIL SA SAGBAYAN

DUHA KA LALAKI GIPAMUSIL SA SAGBAYAN

Biktima mao sila si ROLANDO QUILATON - hingkod ang pangidaron ug si BARTOLOME REQUIRME SUSON, 20 anyos, usa ka ulitawo parehong nagpuyo sa maong lugar.

Grabeng samad ang ilang naangkon sa human gipamusil ang duha ka biktima sa duha usab ka wala mailhing mga tawo nga nagsakay sa motorsiklo didto sa nasudnong dalan sa barangay San Agustin, lungsod sa Sagbayan sa sayong kabuntagon, adlaw nga Huwebes petsa 12 buwan sa Mayo tuig 2011.

Si Quilaton naigo sa ibabaw nga bahin sa tuong bukton samtang si Suson usab nakaangkon ug samad pinusilan sa tuong bahin sa nawong ug walang bahin sa dughan ug ana karon sa kritikal nga kahimtang sulod sa Gov. Celestino Gallares Memorial Hospital sa dakbayan sa Tagbilaran.

Ang insidente nahitabo samtang ang duha nag tindog-tindog atubangan sa Basketball court diin adunay Disco sa kaulogan sa fiesta sa maong dapit pasado alas 3 sa kabuntagon dihang mihunong ang usa ka motorsiklo nga gisakyan sa wala mailhing mga suspetsado. Matod sa mga nakasaksi sa panghitabo nga gipusil siQuilaton sa backrider sa motorsiklo ug diin dunay niduol nga lalaki nga nisumbag sa backrider ug nahulog kini sa sakyanan ug sa dihang nakabangon kini gisunod niya pagpusil si Suson.
Dayong sibat sa driver sa maong motorsiklo paingon didto sa Bogtongbod, Clarin samtang ang nagpusil nidagan pahilayo. Adunay usa ka barangay tanod nga nakakita sa maong panghitabo apan nagdumili kini pag gukod sa suspek kay nahadlok basin ug siya usab mapusilan.